Kadaugan sa Mactan saulogon

CEBU, Philippines -  Ang mabulokong pagsaulog sa Kadaugan sa Mactan karong tuiga himuon na usab sa Abril 27 pinaagi sa gipasiugda og labing unang makasaysayanong mga kalihokan sa kagamhanan sa dakbayan sa Lapulapu nga pangulohan ni Mayor Paz Radaza.

Gibutyag ni Radaza nga kun gihatagan sa kagamhanan og gibug-aton ang kasaulogan sa Bataan Death March on Bataan Day nga gitawag na karon og Araw ng Kagitingan, death of a hero sa Rizal Day ug ingon man ang pagsaulog sa Bonifacio Day sa matag adlaw niining natawhan, angay lamang usab nga saulogon nga mabulokon ang kadaugan natong naangkon sa panahon ni Magellan.

Si Konsehal Harry Don Radaza nga maoy chairperson sa mga kalihokan isip chairman sa committee on tourism sa konseho sa maong dakbayan miingon nga dili lang ang Battle of Mactan ang masaksihan atol sa maong adlaw sa kasaulogan.

Matud pa niya nga daghan pa ang ilang gihan-ay nga kalihokan nga makadugang sa makasaysayanong aktibidad sa dakbayan nga naglakip sa Rampada, Live Bands Free Concert, Volkswagen Car Show, Car Audiu Bass contest, tricycle contest ug daghan pa.

Dugang pa ni Konsehal Radaza , nga ang laing unang kalihokan nga gihan-ay karong tuiga mao ang pagpili sa   mahimo karong tuiga nga labing haum nga mahimong Princess Bulakna.

Matud pa ni Radaza nga ang mga mananaug sa matag kategoriya nga pagasalmotan sa matag contest adunay giandam nga dakong ganting salapi alang sa mananaug niini. (BANAT NEWS)