CEBU, Philippines - Nadiretso og kamatay tungod sa usa ka samad pinusilan sa tampihak ang usa ka 61-anyos nga lalaki human kini pusila pasado alas-2 sa kaadlawon kagahapon sa eskina sa dalan MC Briones ug Plaridel sa barangay Ermita ning dakbayan.
Ang biktima nailhan nga si Catalino “Tani” Torre, 61, molupyo sa barangay Casantik lungsod sa Sibonga samtang ang suspetsado nailhan usab nga si Roel Nerosa molupyo sa barangay Santikan, Sibonga.
Sa gihimong imbestigasyon sa kapolisan diha sa crime scene ilang napalgan ang patay’ng lawas sa biktima nga nagbuy-od na ibabaw sa usa ka lantay nga wala nay kinabuhi ug nabulit usab sa samad pinusilan.
Pipila ka oras ang milabay ang anak sa biktima nga si Ester, usa ka manindahay og utanon miduaw sa buhatan sa Homicide Section sa Cebu city Police Office mibutyag nga usa sa iyang kauban sa pagpaninda ang nangangkong nakakita sa pagpamusil.
Ang maong nakakita mitug-an sa anak sa biktima nga natulog ang iyang amahan diha sa lantay dihang hinay-hinay nga giduol sa suspek ug walay igong hinungdan gipusil kini makadaghang higayon.
Ang biktima nakaangkon og samad pinusilan sa walang bahin sa tampihak, tuong pulso, walang kamot nga maoy gituohang hinungdan sa iyang hinanaling kamatayon.
Human sa maong panghitabo, dali usab nga misakay og pasaheroan ang suspetsado uban sa laing duha ka tawo nga giingong nagsilbing back-up.
Nasayran sa kapolisan sa ilang gihimong follow up sa kaso, ang biktima ug ang suspetsado nagkabangi na kaniadto.
Nakuha gikan sa crime scene ang duha ka kabhang sa kalibre .45 ug laing usa ka slug sa maong armas. (BANAT NEWS)