Pasahero gilugos sa 4 tripulante

CEBU, Philippines -  Nagtingkagol sa Waterfront Police Station detention cell ang upat ka mga tripulante sa barko usa kanila opisyal human sila pasanginling milugos sa usa nila ka pasaherong babaye samtang ang barkong ilang gisakyan nagbiyahe gikan sa Calbayog, Samar paingon sa dakbayan sa Sugbo.

Ang mga suspetsado mao sila si Timoteo Sampayan, 32, minyo taga Northern Samar ug 2nd mate sa barkong nagbiyahian sa Calbayog-Cebu; Aldren Albarando, 22, taga lungsod sa Argao, Layman Regañon, 24, taga Liloy, Zamboanga Del Norte ug Alvin Nalda, 27, taga San Miguel, Leyte.

Ang ulahing tulo ka mga suspetsado pulos mga apprentice mates sa nahisgutang barko. Si Sampayan nakaipsot sa mga sakop sa Maritime Police apan nadakpan pagkagabii sa samang adlaw.

Si PO2 Jessie Carel sa Maritime Police sa pakighinabi niini sa Banat News nagkanayon nga ang biktima mitaho diha sa ilang buhatan ug misumbong nga siya gilugos sa maong mga tripulante alas 10:45 sa buntag niadtong Biyernes samtang nagbiyahe ang barko gikan sa Samar padulong sa Sugbu.

Wala hinuon madetalye ni Carel kung gabii ba sa Huwebes o kaadlawon sa Biyernes gilugos ang biktima ug kun gitabangan ba kini paglugos o gipuli-pulihan.

Si Albarando, Regañon ug Nalda nasikop dayon sa mga sakop sa Maritime Police diha sa Pier 2 apan si Sampayan nakaikyas.

Mga alas 8:25 sa gabii sa nahisgutan gihapong adlaw si Sampayan nasikop diha sa dalan Colon dakbayan sa Sugbo sa gipahigayong hot pursuit operation sa Maritime Police.

Base sa report sa TV Patrol Central Visayas nga ang biktima giingong nakigkanta-kanta kauban ang upat diha sa maong barko apan kalit lang siya nga gibunlot sa mga suspetsado ug giingong giamong-amongan.

Naabtan sa Banat News kagahapon sa hapon ang abogado sa upat ka mga suspetsado diha sa buhatan sa Waterfront Police Station apan dihang gisuwayan kini og kuha og pamahayag kabahin sa mga pasangil batok sa iyang mga kliyente nagdumili kini og hatag og pamahayag gawas lang sa pag-ingon nga moduso sila og counter-affidavit.

Ang maong abogado nagdumili usab paghatag sa iyang ngalan dinhi sa tigbalita. Samtang ang Banat News misuway usab og kuha sa habig sa upat ka mga suspetsado apan wala usab sila mohatag og komento.

Karong Lunes ang upat gikatakdang pasakaan og tukmang kaso kabahin sa giingong ilang gibuhat diha sa City Prosecutors Office. (EIM) (BANAT NEWS)