Kasong administratiba ni Dumpit gibasura
CEBU, Philippines - Gibasura sa National Police Commission (Napolcom) ang kasong administratiba nga gisang-at batok ni SPO1 Adonis Dumpit kalabot sa pagpusil -patay niini sa gipasanginlang robbery suspect nga si Ron-ron Go niadtong tuig 2004.
Ang direktor sa Napolcom Makati City Martes S. Palomar, maoy mi-aprobar sa dismissal case sa kaso ni Dumpit diin iyang giklaro nga si Dumpit igo lang nga mibuhat sa iyang responsibilidad isip polis niadtong higayona.
Gibutyag usab ni Palomar nga wala siyay nakitang motibo nga tuyoan gyud pagpusil ni Dumpit si Go niadtong higayona.
Matud pa sa Napolcom nga human sa ilang gihimong lawom nga evaluation sa kaso, kombinsido silang ang ‘quantum of proof’ nga magsuporta sa pagka-guilty ni Dumpit wala ma-establisar.
“It was thus necessary to stop or disable the group as their freedom from the bounds of law would only mean more sufferings and fear for the public. Facing imminent danger, Dumpit had acted swiftly. Time is of the essence. It was Dumpit’s solemn duty to serve and protect the people from harm,” pasabot pa sa Napolcom.
Kahinumduman nga niadtong tuig 2004 nahitabo ang pagpamusil ni Dumpit ngadto ni Go dihang giingong nalambigit kini sa usa ka pagpanulis ug sa pagresponde ni Dumpit giingong gi-unhan siya pagpusil sa kampo ni Go niadtong tungura hinungdan nga mibawos kini pagpusil.
Ang inahan ni Go nga si Janet Badana hugtanon kaniadto pang mihimakak nga usa ka tulisan ang iyang anak.
Ang abogado ni Dumpit nga si Atty. Leslie Salva mibutyag nga ang order sa Napolcom ilang magamit sa pagpasaka og motion to bail aron makagawas si Dumpit sa Cebu City Jail. (BANATNEWS)
- Latest
- Trending
