Gwen motabang sa GK

CEBU, Philippines - Andam nga mohatag og P3 milyones   ang kagamhanan sa lalawigan sa Sugbo ngadto sa usa ka non governmental organization (NGO) nga Gawad Kalinga (GK).

Kini ang gibutyag ni Gobernador Gwendolyn Garcia atol sa iyang pagpamulong sa Pilipinas Natin, Pilipinas Para sa Lahat, Pilipinong Walang Maiiwan forum nga gipasiugdahan sa GK didto sa gymnasium sa lungsod sa Bantayan sa miaging adlaw.

Matud pa ni Garcia nga gawas sa pundo nga iyang ihatag, si Kongresista Benhur Salimbangon sa ika-upat nga distrito sa lalawigan, mohatag usab og laing P3 milyones alang sa mga kabus nga nagpuyo sa Bantayan kinsa malipay kaayo alang sa maong hinabang.

Bisan og bag-o lamang nakabisita ang gobernador sa isla sa Bantayan, mibalik gayud kini didto gumikan kay special ang maong kalihukan sa GK alang kaniya.

Samtang nagpasalamat usab ang mayor sa lungsod sa Bantayan Ian Christopher Escario kay ang iyang lungsod maoy napilian nga benepisyaryo sa programa sa GK.

Gani upat ka ektarya nga luna ang gihatag sa lokal nga kagamhanan sa Bantayan aron gamiton sa maong proyekto nga tukoran og mga balay alang niadtong mga pamilya nga mahimong benepisyaryo sa GK.

Ang maong NGO nakatukod na og walo ka mga balay didto sa barangay Ticad, Bantayan.

Gipasabot usab sa Executive Director Luis Oquiñena sa GK nga ilang napilian ang Bantayan gumikan kay gusto silang makatabang sa maong lugar ilabina nga nindot kaayo kining maong dapit.

Mitambong usab sa maong kalihukan si Secretary Herminio B. Colona Jr. sa Presidential Communications Operations Office ug uban pa. (BANATNEWS)