Maguwang gipatay sa manghod

CEBU, Philippines - Nabuslot sa dughan ug namatay dihadiha ang usa ka mag-uuma human kini unaya og pusil sa iyang manghod didto sa barangay Nangka, lungsod sa Boljoon sa miaging gabii.

Ang biktima mao si Jowawen Gumera Romaguera, hingkod, nga molupyo sa maong lugar, samtang ang suspetsado mao ang iyang manghod nga si Jomar, 25. Sa inisyal nga imbestigasyon sa kapolisan sa lungsod sa Boljoon nasayran nga sa wala pa mahitabo ang pagpamusil ang duruha giingong nagkalalis tungod sa maot nga batasan sa suspetsado kun mahubog nga manghagis sa ilang barangay.

Gumikan sa kalagot sa suspetsado nga namaymayan siya sa iyang maguwang, milanit kini sa iyang armas de fuego ug giluthang ang biktima pinaagi sa iyang shotgun.

Tungod sa pagkasabak sa dughan, diha-diha nakabsan sa kinabuhi ang biktima.

Human sa maong panghitabo ang suspetsado dali usab nga midangop ngadto sa hepe sa tanod sa ilang barangay ug nagpahayahay na siya karon sa prisohan.

Matud pa ni SPO4 Emmanuel Villareal, sa Boljoon Police nga nahinabi sa The Freeman/Banat News, ang amahan niini nga si Claudio porsigidong mopasaka og kaso batok sa anak niining nakapatay.

“Ang amahan desidido gyud nga mopasaka og kasong paricide batok sa iyang anak” matud pa ni Villareal. (WC) (BANATNEWS)