CEBU, Philippines - Bisan sa desisyon sa korte nga ipa-uli ang Mitsubishi Pajero nga gipanag-iya ni Bella Ruby Santos ug Ian Charles Griffiths nga maoy gitumbok nga gigamit sa pagdagit ug paglabay sa patay’ng lawas sa 6-anyos nga si Ella Joy Pique wala gihapon kini mahibalik sa mga kamot ni Santos.
Kagahapong adlawa, pasado alas-10 miduaw si Santos sa buhatan sa Criminal Investigation and Detection Group (CIDG) aron unta kuhaon ang maong sakyanan subay sa kamandoan sa korte apan wala kini ihatag sa CIDG.
Kini tungod kay ang CIDG nakasang-at na og motion for partial reconsideration nga naghangyo sa korte nga pabilin nilang ikustodiya ang maong sakyanan.
Tungod niini, ang kampo usab ni Santos misang-at usab og motion for very urgent to cite CIDG and its officers in contempt of court.
Matud pa ni Atty. Rameses Victorius Villagonzalo, nga ang ilang basehan sa pagsang-at sa maong mosyon mao ang kamandoan ni Executive Judge Miendrado Paredes nga nag-ingong i-release kini og balik kang Santos uban sa pipila ka ebidensyang giingong walay gamit sa kaso.
“Such refusal is a plain and simple disobedience to a lawful court order amounting to a contemptuous act punishable under Sec. 3, Rule 71 of the rules of Law,” pasabot pa ni Villagonzalo.
Samtang ang tigpamaba sa Task Force Ellah Joy nga si Sr. Supt. Patrocinio Comendador miingon nga dako og matabang sa padayong imbestigasyon ug sa umaabot nga husay sa kaso ang maong sakyanan isip usa sa ilang ebidensya tungod sa pagtumbok sa mga testigos sa maong sakyanan nga maoy gigamit sa midagit ug milabay sa gipatay na nga si Pique.
“We see no point of returning, this is part and partial of our evidences. “We just hope that court would listen to us,” matud pa ni Comendador.
Nagplano karun ang Task force Ellah Joy nga dugang kaso ang ilang isang-at ngadto ni Santos ug Griffiths nga mao ang pornography, trafficking in person ug laing duha.
Samtang gikompirmar ni Comendador nga aduna na siyay nadawat nga verbal confirmation kalabot sa pagkasikop ni Griffiths sa nasud nga United Kingdom. (BANATNEWS)