Apartment nga gihimong 'cyber sex den' gironda
CEBU, Philippines - Pito ka gituohang biktima sa cybersex ang na-rescue sa kapolisan sa gipahigayong operasyon sa dalan Ultra Pandayan ug Bamboo Hills Occidental lungsod sa Consolacion niadtong miaging adlaw samtang laing duha ka babayeng caretaker nasikop usab.
Ang grupo sa Criminal Investigation and Detection Group ug kapolisan sa lungsod sa Consolacion mi-serve sa search warrant nga gipirmahan ni RTC-7 Branch 15 Judge Samuel Malazarte sa giingong duha ka cybersex apartments sa maong lungsod.
Nasikop sa kapolisan ang duha ka caretaker sa duha ka apartment nga silang ‘Minda’ ug ‘Malou’ (mga ngalan gipugngan nga giingong moapil sad sa paghubo-hubo) samtang nakaeskapo ang gitudlo nilang manager nga si Rauline Villacastin ug ang tag-iya nga si Eric Maurice Fons.
Nakuha sa kapolisan ang lima ka desktop computers nga adunay kompletong accessories, usa ka laptop, sex toys ug pipila ka dokumento.
Sa gipahigayon nga ronda ‘online’ ang mga biktima nga hubo ang kalawasan atubangan sa camera.
Samtang lakip usab sa nasikop mao si ‘Liz’ kinsa naaktuhan gyud nga nagpakita sa iyang hubo nga lawas sa usa ka lawak atubangan sa computer.
Matud pa ni Sr. Insp. Ricky Neron, ang hepe sa CIDG nga pipila ka adlaw nga ilang gipaubos sa surveillance ang maong apartment kini human sila makadawat og taho gikan sa usa ka concerned citizen. (BANATNEWS)
- Latest
- Trending
