CEBU, Philippines - Gibasura sa korte ang gisang-at nga motion to quash search warrant sa kampo ni Bella Ruby Santos kini human nakita sa korte nga walay igong basehan ang pagsang-at sa maong mosyon.
Samtang ang gisang-at usab nga motion to take custody sa habig sa Criminal Investigation and Detection Group (CIDG) gibasura usab sa korte tungod gihapon sa maong rason.
Base sa gipagawas nga order ni RTC-7 Branch 13 Executive Judge Meindrado Paredes kagahapong adlawa mibutyag kini nga ang “the Motion to quash Search Warrant filed by the respondents (Santos) should be, as it is hereby, DENIED for lack of factual and legal basis. The Motion to take Custody filed by the applicant (CIDG) is also DENIED for lack of factual and legal basis.”
Base sa maong order ni Paredes, adunay pipila ka mga butang nga nakuha sa CIDG atol sa search warrant nga ipauli ngadto sa tag-iya tungod kay wala man usab kini malakip sa listahan sa ilang gi-apply nga search warrant.
Ang mga butang nga ipa-uli sa korte ngadto ni Santos mao ang Pajero nga adunay plakang LMJ-382 kini human makit-i sa korte nga dili kini magamit sa nagpadayong imbestigasyon kalabot sa pagdagit patay ni Ella Joy Pique.
Laing ipa-uli sa korte ngadto ni Santos ang hair strands, Lan cord (195cm), Nintendo DS game cartridge, rug, sex toys, empty porn CD covers and assorted CD’s, waiver and assorted ID’s and Passport, ug bato.
Samtang ang ipabilin ang bed sheet nga may lama sa dugo, USB and Card Reader, Video Cam ug accessories ug tapes, blanket gikan sa bodega nga dunay lama sa dugo, lamesa ug CD card, panapton nga gikan sa katre nga may lama sa dugo ug laing bed sheet nga duna gihapoy lama sa dugo.
Matud pa ni Paredes nga kadto rang gipabilin sa korte ang magamit sa nagpadayong imbestigasyon apan gikinahanglan usab nga kun ugaling ablihan o gamiton ang mga ebidensya gikinahanglan usab nga anaa ang habig ni Santos.
Samtang ang legal counsel sa CIDG nga si Atty. Inocensio Dela Cerna, mibutyag nalipay sila nga gibasura ang mosyon sa kampo ni Santos.
Sa bahin usab sa Task Force Ellah, ang tigpamaba nga si Sr. Supt. Patrocinio Comendador mibutyag dako ang ilang kalipay sa maong kamandoan.
Matud pa ni Comendador nga bisan paman og giuli sa korte ang sakyanan ni Santos gihulagway niini nga lig-on gihapon ang ilang gikuptan nga kaso.
Human sa pagbasura sa maong mosyon, nagplano karun ang Task Force Ellah nga mosang-at og laing kaso nga Pornography ug Anti-Trafficking in Persons Act.
Samtang buot ni Comendador nga makadawat og opisyal nga pahibalo gikan sa iyang mga labaw kabahin sa pagkaaresto kang Ian Charles Griffiths didto sa London.
Si Griffiths ug Santos maoy gikasuhan kabahin sa pagdagit ug pagpatay sa 6-anyos nga batang si Pique niadtong Pebrero 8 didto sa Calajoan lungsod sa Minglanilla. (BANATNEWS)