Mabdos, kapuyo gitagod

CEBU, Philippines - Nabulit sa mga samad tinigbasan hangtud mamatay ang usa ka lima ka buwang mabdos ug ang iyang kapuyo human sila gipanigbas sa ilang silingang hubog diha sa sitio Calubihan sa barangay Ilihan sa dakbayan sa Toledo sa milabay’ng Miyerkules sa gabii.

Ang nangamatay mao si Mercidita Manundo, 37, ug kapuyo niining si Lito Blanco, 27, pulos molupyo sa nahisgutang lugar samtang ang suspek mao ang ilang silingang si Armando Ortiz, 52.

Matud ni SPO3 Carmelito Hornales, desk officer sa Toledo City Police dihang nahinabi sa Banat News subay sa ilang imbestigasyon ang biktima nga si Lito ug ang suspek nag-inom sa pinuy-anan sa naulahi uban sa duha pa nila ka barkada.

Dihang nangahubog sa tuba nga gisagulan og rhum nagsugod na ang lalis tali sa biktima ug suspek tungod kay wala nay usa nga magpalupig sa estorya miabot sa puntong napungot ang suspek ug mikuha og sundang dayun gitigbas makadaghang higayun si Blanco.

Ang kapuyo ni Blanco nga si Mercideta nga nakakitang natumba ang kapuyo ug naputos na sa samad tinigbasan ug padayong gitagod-tagod sa suspek daling miduol aron unta tabangan kini apan mao na usab kini ang gitigbas sa suspek makadaghang higayun sa tiyan ug ubang bahin sa lawas ug hapit pa maputol ang duha ka paa niini ug kamot sa pagsinagang hangtud nga namatay.

Ang suspek nagdaling misibat human nag-abot abot na ang mga silingan sa lugar ug pag-responde sa kapulisan ang nagkadugong sundang nalang nga gigamit sa suspek maoy ilang naabtan diha sa crime scene.

Ang bayaw sa suspek nga si Martino del Pino nga maoy nakadiskubre sa suspek sa gitagoan niini sa barangay Sangi mao nay midakop niini ug gidala sa kapulisan.

Ang suspek nagtingkagol na sa karsel human usab gihikay na ang kasong ipasaka sa korte batok niya. (EIM) (BANATNEWS)