Gidul-itag pusil sa tampihak

CEBU, Philippines - Nalungag ang ulo sa usa ka drayber sa traysikad human kini gipusil sa ulo sa laing drayber sa traysikad samtang namasahero diha sa national highway sa Poblacion siyudad sa Danao niadtong Miyerkules sa alas 6:00 sa gabii.

Ang biktima nga namatay diha-diha mao si Benjamen Gratcho, 20, taga barangay Taytay sa dakbayan sa Danao samtang ang kriminal kansang pangalan wala pa matumbok sa kapulisan giingong usa gihapon ka drayber sa traysikad base sa gibutyag sa mga saksi.

Subay sa spot report nga gipadangat sa Danao City Police sa Cebu Police Provincial Office (CPPO) , ang biktima mao pay pag-pick up og pasahero aron iyaha untang ihatud.

Apan pag-abante palang niya sa Juan Luna Extension sa maong lugar gisundan kini sa mamumuno nga nagsakay usab og sikad-sikad mipasirit og apas kaniya ug dihang nakaduol gidul-itan og pusil sa walang tampihak si Gratcho.

Ang bala milahos ngadto sa pikas tampihak ug nahagbong gikan sa traysikad si Gratcho hinungdan sa pagkaratel og naog sa iyang pasahero ug nangayo og tabang.

Pag-abot sa mga nirespondi nga polis patay na ang biktima nga nagbuy-od.Sa paghimo ning balita padayun pa ang manhunt operation sa kapulisan pagsikop sa nagtago tago nga kriminal. Personal nga bangi ang gitutukang motibo sa maong krimen. (BANATNEWS)