CEBU, Philippines - Gibanhaw og balik ang awhag sa Bureau of Fisheries and Aquatic Resources (BFAR)-7 nga palikayan sa katawhan ang pagkaon sa isdang butete tungod kay kini makahilo ug makamatay sa tawo.
Matud pa ni Assistant Regional Director Allan Poquito sa BFAR7 nga ang paglab-as ning maong pahimangno nahimo human mamatay ang amahan ug anak nga taga barangay Botigues, isla sa Bantayan human mokaon og isdang butete sa miaging adlaw.
Mahinumdoman nga sila si Peter Cordova ug ang asawa niini nga si Eva uban sa ilang mga anak nga si Peter Paul ug Jeofer, nangaon sa butete nga maoy sud-an nila sa paniudto niadtong Lunes.
Ang maong mga isda, nakuha ni Cordova sa iyang pagpanagat ug tungod kay anad na sila sa pagluto ug sa pagkaon niini, wala na sila magpanuko dihang gipaniudto nila ang maong sud-an.
Human sa ilang paniudto mireklamo na ang tibuok pamilya bahin sa kasakit sa ilang tiyan, nagsuka-suka, nalipong, hangtod nga ang amahan nga si Peter Cordova nabugtoan si kinabuhi.
Samtang si Peter Paul namatay usab duha ka takna human mabugtoi sa ginhawa ang iyang amahan.
Si Eva ug si Joefer maoy nalibre sa tambalanan.
Sumala ni Poquito nga daan na nilang gipahibawo nga makahilo ang isdang butete ug gani nasayud na ang tanan bahin sa ka peligro ning matanga sa isda.
Gipasabot niya nga dili tibuok lawas sa butete ang makahilo, kundi may bahin kini sa lawas nga maoy tinubdan sa hilo ug kun mahitabong makaon sa tawo mamiligro gyud ang kinabuhi niya. Iyang giklaro nga bisan kun unsa ka maayo moluto og butete sa kusinero dili kini garantiya nga luwas kan-on ang maong isda.
Gitambagan ni Poquito ang publiko bisan sa kalisud sa panahon karon mas makaayo nga likayan gyud ang pagkaon sa isdang butete aron nga di madisgrasya ang kinabuhi. - BANAT NEWS