CEBU, Philippines - Gikalipay sa tigpamaba sa Task Force Ellah Joy, nga si Sr. Supt. Patrocinio Comendador ang pagkasikop ni Ian Charles Griffiths, ang hinigugma ni Bella Ruby Santos nga nalambigit sa kasong Kidnapping with Homicide kalabot sa pagdagit ug pagpatay sa 6 anyos nga si Ellah Joy Pique
Nasayran nga si Griffiths nasikop sa mga otoridad sa London Police niadtong Sabado apan matud pa ni Comendador nga padayon pa niyang gisusi kun may labot ba kini sa kasong Ellah Joy.
Si Comendador kinsa maoy kasamtangang hepe sa Cebu Provincial Police Office (CPPO) miingon nga gisuta pa usab nila kun unsang ahensyaha sa kagamhanan sa nasud nga nakig-koordinar sa kapolisan sa London nga misikop kang Giffiths.
Giklaro ni Comendador nga ang pagkasikop ni Grriffiths dili magamit nga ebidensya sa ilang gipasakang kaso batok niini tungod kay ang balaod sa United Kingdom ug sa Pilipinas managlahi.
Sa hulga sa mga otoridad sa UK nga mokiha sa kapolisang mipasangil kang Griffiths ug sa uyab niini nga si Bella Ruby Santos may labot sa pagdagit ug pagpatay kang Pique, si Comendador nagkanayon nga gipangandaman nila kini.
Midugang siya nga wala sila mabalaka niini tungod kay ang kiha ug mga kaso kaluha sa ilang pagtuman sa ilang katungdanang pamolis.
Apan gipasabot usab ni Comendador nga walay problema kun ugaling mopatim-aw si Griffiths dinhi sa Pilipinas tungod kay gikinahanglan niyang moatubang sa kaso nga gisang-at batok kaniya ug sa iyang hinigugma nga si Santos dinhi sa Sugbo.
Nasayran sa report nga si Griffiths mitawag sa iyang abogado nga si manlalaban Anna Luz Cristal ug mipahibalo nga siya gisikop sa kapolisan sa London ug gitanggong sa karsel sulod sa duha ka adlaw.
Sa report sa The Sun, news online sa UK nasayran nga niadtong Domingo nakapiyansa si Griffiths busa nakagawas gikan sa prisohan.
Samtang sa report sa usa ka British legal source kini nagkanayon nga "A lot of work is being carried out by police in both countries into his background."
Samtang ang kanhi asawa ni Griffiths nga si Drena Griffiths gikan sa ilang balay sa Southampton , mibutyag base sa report sa The Sun nga nasayud siya nga dako kaayo ang iyang pagtuo nga inosenti ang iyang kanhi bana sa maong pasangil.
"I know Ian is innocent. I have spoken to him recently and the truth will be revealed soon," pasabot pa ni Drena Griffiths.
Apan si Santos ang hinigugma ni Griffiths sumala sa balita sa ABS-CBN Central Visayas nagkanayon nga dako siya og pagtuo nga may labot gyud sa kasong Ellah Joy ang pagdakop kang Griffiths didto sa London.
Samtang sa laing bahin, malaumon si Comendador nga unta mopabor ngadto kanila ang desisyon sa motion to quash search warrant and return seized items.
Matud pa ni Comendador nga unta kun mopabor kanila ang desisyon ni Judge Mendrado Paredes ila kini nga magamit isip ebidensya unya sa ilang pagpalig-on sa kaso nga ilang gipasaka batok ni Santos ug ni Griffiths.
“Amo lang itugyan ni Judge ang kinabuhi sa among kaso,” pasabot pa ni Comendador.
Apan midugang usab siya nga kun ugaling dili gayud mapabor kanila ang desisyon, wala na silay mahimo niini apan iyang gihulagway nga lig-on gihapon ang ilang gisang-at nga kaso batok ni Santos ug Griffiths. - BANAT NEWS