Grupo sa batan-ong tulisan nadakpan

CEBU, Philippines - Nasikop sa kapulisan ang upat ka mga batan-ong tulisan nga giingong nanulis sa usa ka multicab nga nagbiyahian sa siyudad sa Sugbo paingon sa lungsod sa Minglanilla diha sa Belmont Village, Lipata barangay Linao Minglanilla kagahapon sa ala 1:45 sa kaadlawon.

Ang upat ka mga nadakpan mao sila si Mark Francis Quijano, 20, nagpuyo sa Belpal Minglanilla, Arnel Sari, 24, nagpuyo sa barangay Calajoan Minglanilla, Argie Dijos, 18, nagpuyo sa Springville barangay Pakigne ug usa ka 17- anyos nga taga Belpal Pakigne, Minglanilla.

Samtang ang upat ka mga pasahero nga ilang gibiktima mao sila si Desiree Tulda, 25; Thomesis Tulda,19; Suldania Marie, 21, ug Fredison Lopez, 31, taga barangay Tungkop, Minglanilla.

Subay sa imbestigasyon ang mga biktima nga sakay sa multicab nga pasaheroan gikan sa siyudad sa Sugbo paingon sa maong lungsod dihang ang mga suspek kalit lang mituktok aron mohunong pag-abot sa maong dapit.

Diha-diha usa sa mga suspek ang mibunot og armas nga kalibre .38 ug giti-onan ang drayber dayung deklarar og tulis.

Samtang ang tulo ka mga suspek maoy mihimulbol sa mga bag ug kabtangan sa mga biktima lakip na mga alahas ug yano kaayong nanganaug ug nanglakaw paingon sa sudlonong bahin sa Belmont Village.

Ang mga pasahero midangop sa buhatan sa kapulisan ug ang grupo nila ni SPO1 Renato Masangkay daling migukod sa grupo ug naabtan ang upat nga yano ra kaayong nanglakaw.

Dihang positibong gitudlo sa mga biktima ang upat dali silang gidakop ug narekober kanila ang mga butang sa mga biktima ug usa ka kalibre .38 nga paltik nga rebolber.

Ang mga suspek nagtingkagol na sa karsel human usab gipasakaan og kaso sa kapulisan sa korte. - BANAT NEWS