Sidewalk vendors sa Mandaue i-demolish

CEBU, Philippines - Gipaguba ni Mayor Jonas Cortes ang mga ilegal nga estraktura sa daplin sa kadalanan sa dakbayan sa Mandaue nga maoy hinungdan nga midaghan ang mga sidewalk vendors nga nakaingon nga lisod nang agian sa mga motorista ug sa mga pedestrians.

Gihimo ni Mayor Cortes ang maong kamandoan alang sa hugot usab nga pagpatuman sa ordinansa nga nagdili sa mga manindahay sa daplin sa dalan nga maninda sa panahon sa kagabhion.

Ang legal officer sa dakbayan sa Mandaue nga si Giovanni Tianero gimandoan ni Cortes sa pag-umol og duha ka grupo nga maoy mangguba sa maong mga sidewalk vendors.

Kini base sa ordinansang giaprobahan niadtong tuig 2003 nga nagdili sa pagpatukod og mga tindahan o pagbutang og estraktura nga makaali sa dalan.

Ang unang gihawanan mao ang kadalanan sa barangay Centro, Mantuyong, Guizo, Subangdaku ug Ibabao Estancia.

Hinuon ubos sa gipatuman nga ordinansa adunay mga higayon nga itugot ang paninda sa daplin sa dalan apan kini matigayon lamang sa espesyal nga adlaw nga adunay dagkong kalihukan.  - BANAT NEWS