CEBU, Philippines - Nangangkon ang usa ka opisyal sa Mabolo Police Station nga si Insp. John Linbert Yango nga dili ‘intentional’ ang pag-eskapo sa usa ka gwardiya sa Philippine Amusement and Gaming Corporation nga gipasanginlang milugos sa usa ka 22-anyos nga babaye niadtong Sabado.
Padayon karong gipangita ang suspek nga si Lysander Pardilla nga taga Bolton St., sa barangay Lahug ning siyudad human giingong nakaeskapo. Ang jailer nga si PO1 Lloyd Magdadaro gikatakdang ipaimbestigar tungod sa hitabo.
Apan si Yango nga nahinabi sa The Freeman, igsuong mantalaan sa Banat News, nagkanayon nga si Magdadaro na-busy niadtong tungura dihang nakahigayon og eskapo si Pardilla diha sa ilang kusina.
Human nabantayan ni Magdadaro nga nahanaw na si Pardilla daling gitawag ang atensyon niini apan wala na igkita ang suspek. “Wa siguro gituyo ug pagawas wala lang mabantayi nga migawas,” matud pang Yangu.
Ang biktima nga impleyado sa usa ka kan-anan diha sa Salinas Drive giingong maoy nag-serve sa beer nga gi-order sa suspek kinsa adunay laing duha ka mga kauban apan kalit kining gibitad ug gipalingkod sa tunga-tunga. Dihang nagdumili ang dalaga gibitad siya sa suspek ug gipasakay og taksi, wala siya makasinggit tungod kay gipugngan niini ang iyang baba ug gidala siya sa usa ka motel diin siya giingong gilugos.
Human sa hitabo alas-4 sa hapon migawas sila sa motel ug ang suspek mikanaog diha sa Archbishop Reyes ug gimanduan ang drayber nga pakanaogon siya sa Salinas Drive sa barangay Lahug, apan ang biktima midangop sa barangay hall sa Barrio Luz ug misumbong sa nahitabo.
Sila si Jopel Gelig, Ruel Lambayong ug Dante Palconet nga mga tanod giubanan ang biktima sa usa ka convenience store ug gisikop ang suspek.
Si Chief Insp. Romeo Santander, hepe sa City Intelligence Branch (CIB) ingon man ang Investigation and Detective Management Branch (IDMB) mipahigayon og lain nga imbestigasyon ubos sa kamanduan ni Sr. Supt. Melvin Ramon Buenafe batok ni Magdadaro alang sa kasong administratiba. - BANAT NEWS