Suspek sa chopchop ladies gikombikto

CEBU, Philippines - Gihukmang mabilango og reclusion perpetua o pagkabilanggo sa tibuok niyang kinabuhi ang usa sa suspetsadong mitagud-tagod sa mag-agaw’ng Eva Mae Peligro ug Gwendolyn Balasta.

Si Joseph Roy Cellar usa sa tulo ka mga akusado sa pagpatay sa nahisgutang mga biktima ang nagkanayon nga nagmahay siya sa iyang gibuhat.

Sa unang arraignment sa kaso si Cellar uban sa laing duha ka mga akusado nga sila si Richard Gudelosao ug Jean Antonette Medalle mi-plead not guilty sa kasong murder nga gipasaka batok kanila.

Apan si Cellar mihangyo og re-arraignment sa iyang kaso diin siya mi-plead guilty ug miluwat og affidavit of confession.Ang maong pag-angkon ni Cellar nasuportahan kini sa mga lig-on nga mga ebidensiya batok kaniya.

Kagahapon si Regional Trial Court (RTC) Judge Generosa Labra sa Branch 23 mipagawas sa iyang hukom nga si Cellar guilty beyond reasonable doubt sa two counts sa kasong murder diin siya gihukmang mapriso sa tibuok niyang kinabuhi.

Si Labra mimando usab ngadto kang Cellar nga mobayad og P50,000 ngadto sa pamilya ni Peligro isip civil indemnity ug laing P50,000 isip moral damages ngadto sa pamilya ni Balasta.

Ang prosekusyon mipresentar og walo ka mga saksi usa niini si Dr. Nestor Sator kinsa maoy mi-autopsy sa mga patay’ng lawas ni Peligro ug Balasta niadtong Hulyo 22, 26 ug 28, 2008 diin iyang nasuta nga gipangtuok kini nga hinungdan sa ilang kamatayon.

Ang patay’ng lawas sa mga biktima gipangputol-putol kini ngadto sa pito ka bahin dihang wala na silay kinabuhi diha sa balay ni Felix Gudelosao sa Hacienda Firenze, barangay Maghaway, dakbayan sa Talisay.

Ang putol-putol nga patay’ng lawas sa mga biktima gipangsulod sa 13 ka mga garbage bags ug gipanglabay ngadto sa bukirang barangay sa Talisay, dakbayan sa Toledo, Naga ug Minglanilla.

Ang abogado sa akusado nga si Salvador Solima nagkanayon nga dili sila moduso og appeal kabahin sa hukom sa korte ngadto kang Cellar sanglit ang pag-angkon ni Cellar nga siya maoy mibuhat sa krimen makahatag kini og kalig-on sa depensa pabor ngadto nila ni Medalle ug Gudelosao. Ang kaso batok kang Gudelosao ug Medalle magpadayon pa.  - BANAT NEWS