CEBU, Philippines - Duha ka kinabuhi ang nakalas sa aksidente sa sakyanan sa kadalanan sa managlahing lugar ning lalawigan sa Sugbo sa miaging Domingo.
Ang nakalas mao sila si Celirina Mitante Gelig, 74, nga taga barangay Nailon, dakbayan sa Bogo ug Carlos Villegas, 24, nga taga barangay Piñas, lungsod sa Dalaguete.
Sumala sa imbistigasyon sa kapolisan sa Bogo, nga ang midasmag kang Gelig usa ka motorsiklo nga gimaneho sa usa ka bayong-bayong nga 13 anyos.
Kini dihang milabang siya sa karsada didto sa barangay Nailon ug ang nagmaneho sa nagbaguros nga motorsiklo wala na makakontrolar niini hinungdan nga naigo gyud ang biktima sa iyang motorsiklo.
Ang biktima nalagpot ug mitugpa sa sementadong karsada nga nag-una ang ulo nga maoy hinungdan sa hinanali niyang kamatayon.
Samtang si Villegas, nanaog sa gisakyan niyang bus, paingon ngadto sa Dalaguete gikan sa dakbayan sa Sugbo, kay mangihi sa pikas daplin sa karsada , dihang wala siya makabantay sa nagbaguros nga minibus nga gimaneho ni Crisanto Para, 45, nga taga barangay Poblacion, dakbayan sa Naga.
Gumikan sa kakalit sa paglabang sa biktima, wala na kakontrolar ang suspetsado sa iyang sakyanan, busa napunggit niini ang biktima.
Maayong pagkalagpot ni Villegas ug mitugpa usab kining naugbok ang ulo sa sementadong karsada nga maong hinungdan sa hinanali niyang kamatayon.
Ang kapolisan sa mga lugar nga nahitaboan nagtuo nga madala ra og sabotsabot ang maong hitabo tali sa mga tagtungod sa mga biktima ug sa mga respondente. (WC) - BANAT NEWS