Pagtugot sa konseho wa na kinahanglana-Rama

CEBU, Philippines - Gipadayag ni Mayor Michael Rama nga dili angayan himuong isyu sa konseho sa dakbayan sa Sugbo ang paglagda niya isip sakop sa Metro Cebu Development Coordination Board (MCDCB).

Giklaro ni Rama nga wala’y kwarta nga naglambigit sa pagpirma niya sa MCDCB busa wala na kinahanglana pa og pagtugot sa konseho sanglit pagtinabangay lang ang tumong sa maong grupo nga gipangulohan ni Gov. Gwendolyn Garcia.

Kahinumduman nga onse ka mga mayor sa Sugbo ang mipirma og kasabotan nga magtinabangay alang sa kalamboan ug pagpatuman og mga programang makatabang sa ilang tagsa-tagsa ka mga konstituwente.

Dugang pa sa mayor nga wala siya’y nakitang dautan sa iyang gibuhat sanglit makakuha man usab kini og maayong bunga ang siyudad sa pagpasakop sa MCDCB.

Apan si Bise Mayor Joy Augustus Young misaway kang Rama kagahapon gumikan kay wala gyud kini nag-agi og konseho.

“Sa una murag dili siya interesado nga mo-sign ana, unya karon, makugang lang ta kay nipirma na siya,” suma pa ni Young.

Sumala pa sa bise mayor nga importante nga pahibaw-on ni Rama ang konseho sanglit gidala man niini ang imahe sa dakbayan sa Sugbo.  - BANAT NEWS