Mangingilad gibalhug sa prisohan

CEBU, Philippines - Nagtingkagol sa Talisay City detention cell ang usa ka 37-anyos nga babaye human kini pasanginling nangilad sa inahan ug anak nga iyang gipuy-an sa sitio Kimba, barangay Cansojong, dakbayan sa Talisay.

Lakip sa nailad ang duha ka higala sa inahan ug anak nga biktima ug ang maong pagpangilad nahitabo gikan niadtong Disyembre 4, 2010 hangtud Marso 29, 2011.

Ang suspetsado mao si Maria Isabel Tecson Abelgas, temporaryong nagpuyo sa Kimba ug siya nasikop niadtong Biyernes sa gabii duol sa simbahan sa barangay Guadalupe, dakbayan sa Sugbo atol sa gipahigayong hot pursuit operation sa mga polis batok kaniya. Ang inahan ug anak nga mga biktima mao si Evelyn, 53, ug Marissa Abellana, 29, taga Kimba usab, lakip ang ilang mga higala nga sila si Bonifacio Sacno, 53 ug Jerosin Cabuenas, 29 , nga pulos taga barangay Lagtang, Talisay.

Si PO3 Mikie Espina nga nahinabi sa Banat News kagahapon mibutyag nga niadtong buwan sa Disyembre 2010 si Abelgas kinsa gikan sa Manila nahiabot sa barangay Cansojong ug nangita og kapuy-an. Ang inahan ug anak nga Abellana naluoy sa suspetsado hinungdan nga ila kining gipapuyo diha sa ilang balay.

Unya ang suspetsado mihangyo sa inahan ug anak nga mohuwam og kwarta kay ilisan dayon niya kung ma-withdraw niya ang iyang kwarta gikan sa HSBC.

Matud ni Espina nga si Abelgas mibutyag ngadto sa mga biktima nga aduna siya’y “last will” testament sa Taylor clan ug minilyon nga kantidad sa kwarta ang iyang makuha gikan sa HSBC.

Midugang si Espina nga si Abelgas mipasalig nga tuboan niya og daku ang kwartang iyang gihuwaman ug kadtong mga tawong mitabang kaniya hatagan usab niya kini og minilyon nga kwarta kung ma-withdraw na niya ang iyang kwarta gikan sa bangko.

Ang inahan ug anak nga biktima nahaylo sa pasalig sa suspetsado hinungdan nga mipahuwam kini og kwarta ug gi-refer usab nila ang suspetsado ngadto sa duha nila ka higala aron makahuwam usab og kwarta.

Mikabat ngadto sa P160, 000 ang kwartang nahuwam ni Abelgas ngadto sa upat ka mga biktima.

Ang suspetsado ug mga biktima aduna pa’y gipirmahang mga dokumento pagmatuod kunohay nga mobayad si Abelgas sa iyang gihuwam nga kwarta kung makuha na niya ang iyang kwarta gikan sa HSBC.

 Apan human mahuwami ni Abelgas ang mga biktima og kwarta mibiya kini sa iyang gipuy-an ug wala na magpakita.

Busa gisusi sa mga biktima ang HSBC ug ilang nasuta nga ang mga dokumento nga ilang gipirmahan gikan sa suspetsado mini ug dili tinuod nga duna kini “last will” testament.

Human masayri sa upat nga nailad diay sila dali silang miadto sa police station ug gi-report ang maong hitabo.

Nabawi sa mga polis gikan sa suspetsado ang tulo ka payout receipt sa kwarta padala nga dunay petsang Marso 11, 2011, usa ka resibo sa Western Union money transfer nga dunay petsang Pebrero 24, 2011, China Bank peso savings account, mga passport sa suspetsado ug sa iyang anak nga gituohang mga peke, rubber stamp, usa ka stamp maker, usa ka stamp pad, nagkalain-laing ginunting nga seal logo, 11 ka mga cash withdrawal form, usa ka stab nga kolor green sa foreign currency note-bank sell sa HSBC, usa ka stab sa application form alang sa funds transfer ug upat ka mga dokumento sa HSBC. (BANATNEWS)