50 ka polis sa Lapulapu gi-promote

CEBU, Philippines - Mikabat sa 50 ka mga miyembro sa kapolisan sa Lapulapu City Police Station ang gihatagan og promosyon sa kagamhanan sa dakbayan sa Lapulapu kagahapon.

Ang Pinning Ceremony nga gipahigayon didto sa dakbayan gisaksihan usab sa mga pamilya sa nahisgutang mga polis kinsa miduyog sa pagpasalamat nga gihimo sa ilang mga minahal sa kinabuhi nga nakadawat sa maong promosyon.

Gipangunahan ni Mayor Paz Radaza uban usab sa hepe sa kapolisan sa dakbayan nga si Sr. Supt. Anthony Lao Obenza, Supt. Pedrillo Villamor Jr. ug Supt. Clifford Gairanod.

Sa samang higayon si Radaza mitunol usab sa walo ka mga brand new nga motorsiklo, rubber boat ug sea ambulance ngadto sa mga kapolisan nga gidestino isip tourist police.

Ang maong mga kahimanan maoy gamiton nila sa panahong mohimo sila og operasyon sa kapatagan ug kadagatan samtang magpahigayon sila og kasegurohan sa mga turista nga anaa sa dakbayan. Sa samang higayon gi-turn over usab ni Radaza ang usa ka edipisyo nga alang sa Police Station 3 sa barangay Gun-ob, sa maong dakbayan.

Gitakda nga unya pa sa Abril 16 ning tuiga buksan ang maong buhatan sa kapolisan sa Gun-ob. Si Radaza sa iyang pagpamulong atol sa mga seremonyas sa maong mga kalihokan nagkanayon nga iyang gihimo ang tanang ikaayo sa kapolisan sa dakbayan.

Matud pa niya nga ang iyang tinguha nga gawas sa kapatas-an ang ranggo sa mga kapolisan, ikahatag usab kanila ang hustong ayuda aron nga dili sila maglisod sa mga gimbuhaton nga may labot sa pag-atiman sa kalinaw ug kahusay sa dakbayan pinaagi sa mga tukmang kahimanan nga magamit nila sa tanang higayon. (BANATNEWS)