CEBU, Philippines - Kritikal ang kahimtang sa usa ka ex-convict human kini pusila sa gituohang mga vigilantes ug napagan pa ang iyang igsuong babaye sa paggawas niini gikan sa bilanggoan atubangan sa SSS Office sa sitio Mustang, barangay Pusok, dakbayan sa Lapulapu sa miaging hapon.
Ang anaa sa talandugong kahimtang mao si Marty Jakosalem, 18, samtang ang iyang magulang babaye nga si Margie Jakosalem, 29 anyos, dalaga ug pulos molupyo sa maong lugar, samdan usab sa tuhod.
Si PO1 Franklin Bolaquia sa homicide section sa kapolisan sa maong dakbayan nga nahinabi sa Banat News miingon nga kadungan sa biktima nga nakagawas sa prisohan mao si Edgar Abendan, 19, kinsa kauban niya sa pagpanulis.
Matud pa ni PO1 Bolaquia nga si Marty samdan sa dughan ug liog ug sa tuhod masabak si Margie.
Sa crime scene napunitan sa kapolisan ang mga kabhang sa mga bala sa .45 kalibreng pistola ug laing duha ka mga slug kon tingga niini.
Nasayran nga ang mga biktima naglakaw sa highway gikan sa prisohan paingon sa ilang balay dihang kalit lang gihunongan sa motorsiklo nga gisakyan og tulo ka tawo.
Unya way daghang estorya milanit ang maong mga angkas sa motor sa ilang armas de fuego dayon gipauwanan sa mga bala ang biktima, apan ang iyang maguwang nga diha sa iyang duol, nasabak sa usa ka bala ang tuhod
Ang duha ka mga biktima unang gidala ngadto sa Lapulapu City District Hospital apan gibalhin kini sa Vicente Sotto Memorial Medical Center sa dakbayan sa Sugbo. (WC) (BANATNEWS)