Pag-asa: ting-ulan masinati

CEBU, Philippines - Mipasidaan ang Philippine Atmospheric Geophysical and Astronomical Services Administration (PAGASA) Mactan nga adunay low-pressure area (LPA) ang nasigpatan kagahapon duol sa Catanduanes sa Bicol.

Tungod niini makasinati ang ubang parte sa Visayas ug Mindanao og mga pag-ulan nga magdala og pagbaha.

Si Ella Comahig sa Pagasa-Mactan mibutyag sa Banat News kagahapon sa hapon nga sa ilang obserbasyon mga alas 5:00 sa buntag kagahapon ang LPA nahimutang sa 560 kilometers sidlakang bahin sa Virac, Catanduanes.

Ang Visayas ug Mindanao makasinati og mapanganurong kalangitan ug mga pag-ulan ug ang uban makasinati og pagdugdog ug pagkilat.

Lapad nga mga pagbunok sa uwan ang masinati ngadto sa Eastern Visayas ug North Eastern Mindanao nga maoy sinugdanan sa mga pagbaha ug pagdahili sa yuta.

Ang mga residenteng nagpuyo sa mga bukirang bahin ug daplin sa kasapaan ug kabaybayonan giawhag sa Pagasa nga magmabinantayon aron malikayan ang disgrasya.

Ang kadagatan sa maong lugar ang makasinati sa pagka-moderate ngadto sa pagka-baloron ug giingong peligro alang niadtong mga gagmay’ng sakyanan sa dagat. (BANATNEWS)