Nangawat og kwarta sa pari sikop

CEBU, Philippines - Nagtingkagol sa Talisay City detention cell ang usa ka 55-anyos nga lalaki human kini masakping nangawat og kwarta   didto sa Agustinian Novitiate Prayer House sa barangay Lower Mohon, dakbayan sa Talisay kagahapon sa alas 10:00 sa buntag.

Ang biktima mao si Padre Ambrosio Galindez, 80, nagpuyo sa nahisgutang lugar.

Ang suspetsado mao si Ramon Roma, taga barangay Tungkil, lungsod sa Minglanilla ug giingong anak sa kanhi piyanista sa simbahan nga higala sa pari nga biktima.

Nabawi gikan kang Roma ang P1,000 nga kwarta nga giingong iyang gikuha gikan sa pitaka sa pari apan nasakpan kini ni Edmar Antone, 29, caregiver sa biktima.

Si PO2 Leandro Azarcon sa theft and robbery section sa Talisay City Police Station nga nahinabi sa Banat News kagahapon nagkanayon nga si Roma makasulod-sulod sa nahisgutang Novitiate House tungod kay nailhan kini sa pari nga anak sa kanhi piyanista sa simbahan.

Matud ni Azarcon nga nabantayan ni Antone si Roma nga kadudahan og lihok ug dihang migawas si Padre Galindez sa iyang kwarto misunod sa pagsulod ang suspetsado.

Si Antone naniid kini sa lihok ni Roma ug hilom usab nga gisundan ang suspetsado.

Giingong naaktohan ni Antone si Roma nga gikuha sa suspetsado ang pitaka sa pari gikan sa karsones niini ug human ablihi, gihulbot ang P1,000 nga kwarta si Roma.

Sa maong sitwasyon gisignit ni Antone si Roma ug nangayo kini og panabang sa gwardiya kinsa diha sa gawas sa gate ug gidala nila ngadto sa TCPS ang suspetsado.

Si Azarcon midugang nga miangkon si Roma nga nanguha og kwarta sa pari tungod kay wala siya’y kwarta. - BANAT NEWS