6 nangaangol pagsampak sa bus sa trak

CEBU, Philippines - Unom ang naangol apil na ang drayber human mobangga ang bus pasaheroan sa nag-parking nga trak de karga sa barangay Tinaan siyudad sa Naga kagahapon sa alas 5:40 sa sayong buntag.

Ang nakabangga mao ang Ceres Bus Liner nga dunay plaka nga RJC-850 nga gimaneho ni Arnold Andrade, kinsa naangol ug nalandig sa tambalanan.

Samtang ang drayber sa nag-parking nga Isuzu Elf kolor puti nga nagtangag sa plaka nga GBW-224 mao si Rodrigo Pulgo, 52, taga East Poblacion lungsod sa Moalboal.

Giila ang mga pasahero nga naangol mao sila si Maribal Bajo, 40, taga Argao; Rosalina Torre, 30, taga Sibonga; Ernino Vergara, 23, taga Alcantara; Rex Porosuelo, 24, taga Lorega-San Miguel sa dakbayan sa Sugbo ug Carlo Amaclio, 25, taga Martirez siyudad sa Sugbo.

Matud ni PO3 Bernard Otida sa Naga City Police dihang nahinabi sa Banat News nag-parking sa maong dapit ang Isuzu Elf na-flat ang ligid ug giilisan og ligid sa drayber ug helper niini.

Apan samtang kini nag-asikaso pag-ilis sa ligid kalit nga mibutho ang naghaguros usab nga Ceres bus paingon sa siyudad sa Sugbo ug misampak sa trak de karga.

Gihulagway sa mga nakasaksi nga kusog kaayo ang impact tungod kay human mabangga-i ang trak de karga nadaro kini paingon sa sementadong kural sa daplin ug natangtang ang makina niini.

Maayo usab pagkabungkag sa atubangang bahin sa Ceres bus samtang nangaangol ang mga pasahero niini lakip na ang drayber ug daling gidala sa South General Hospital sa maong siyudad ug luwas na sa makuyaw nga kahimtang.

Sa pasiunang imbestigasyon sa kapulisan gituohan nga nasipyat sa pagkarkula ang drayber sa bus sa distansya sa trak de karga maong misampak apan wala usab isalikway ang posibilidad nga nakatagpilaw ang drayber niini. - BANAT NEWS