Larsian road buksan ni Gwen

CEBU, Philippines - Ang kagamhanan sa lalawigan sa Sugbo nakadesisyon na sa pagbukas og balik sa Larsian Road sa may Fuente Osmeña ning siyudad sa Sugbo.

Sumala pa ni Cebu City Traffic and Operation Management (CITOM) chairman Sylvan Jack Jakosalem nga si Gob. Gwendolyn Garcia nakahukom sa pagbukas og balik sa Larsian Road human personal niyang gitunol ang resolusyon sa konseho sa siyudad sa Sugbo nga naghangyo sa gobernadora nga buksan ang maong dalan.

Ang maong dalan nasirad-an tungod sa panagbangi sa kanhi administrasyon sa dakbayan sa Sugbu panahon ni kanhi mayor ug karon kongresista Tomas Osmeña. Ang maong dalan nahimutang sa lote nga gipanag-iya sa kagamhanan sa lalawigan sa Sugbo. Sumala pa ni Jakosalem nga nakita sa gobernadora ang kamahinungdanon sa mga motorista ang paggamit sa maong dalan ilabi na sa mga pasyente nga magdaling masulod sa Chong Hua Hospital.

Hinuon giklaro ni Jakosalem nga iya usab nga gisanong ang gipangayong kundisyon sa gobernadora nga dili mahugpaan sa mga vendors ang maong dalan susama kaniadto nga gihimo kining baligyaanan og barbeque nga misikat nga “larsians.”

Si Jakosalem uban ang abag ni Cebu City Mayor Michael Rama ug sa mga miyembro sa konseho sa siyudad sa Sugbo mipasalig nga di kini masubli.

Gawas niini gidawat usab ni Jakosalem ang laing kundisyon sa gobernadora nga ang trailer bed nga gisakmit sa CITOM sa panahon pa ni Osmeña ibalik ngadto sa probinsiya.

Kini bugti usab sa pagpasibog sa gobernadora sa kasong gisang-at sa Kapitolyo ngadto sa korte batok sa mga opisyales sa CITOM tungod sa pagsakmit sa maong trailer bed nga unang giingong illegal parking maong gipaguyod sa Citom. (BANATNEWS)