Camera na maoy modakop sa badlungong drayber

CEBU, Philippines - Angayang magmatngon na ang mga badlungong drayber nga moagi sa dakbayan sa Mandaue kun mapahimutang ug mo-operate na ang monitoring camera nga ibutang sa nagkadaiyang kadalanan sa maong siyudad.

Kini tungod kay pinaagi sa camera wala na kinahanglana pa ang mga traffic enforcers nga mobantay sa kadalanan sa Mandaue sanglit ang masakpan diha sa monitor awtomatikong mabutang sa listahan sa mga violations sa maong sakyanan.

Human niini ang operator o tag-iya sa sakyanang nakalapas sa balaod padad-an pinaagi sa koreyo og suwat ug kopya sa citation tickets aron sila pabayron sa multa.

Si Querubin Mongmongan nga consultant sa kagamhanan sa maong dakbayan miingon nga ang maong pamaagi sa pagdakop sa malapason nga mga drayber ilang gisundog sa nasud sa Amerika nga ang pagdakop ibase na lamang sa makuhang hulagway sa kamera.

Ang maong modernong traffic monitoring system gigahinan og P40 milyones ug gisugdan na karon sa dakbayan ang pag-instalar sa mga traffic lights sa siyam ka intersections sa mga dagkong eskina sa dakbayan.

Sa maong mga traffic lights giingong ibutang ang mga monitoring cameras nga konektado sa tukorong command post diha sa City Hall diin panid-an ang tanang dagan sa trapiko ug kadtong mga badlungong drayber.

Naglakip sa mga intersections mao ang dalan M.C. Briones ug A.S. Fortuna, dalan Ouano Avenue ug C.D. Seno sa reclamation area, dalan S. B. Cabahug ug A. C. Cortes Avenue, dalan Plaridel ug A.C. Cortes Avenue sa barangay Alang-Alang, dalan Plaridel ug P. Burgos Avenue, dalan Plaridel ug U.N. Avenue sa barangay Umapad, dalan Plaridel ug Catalino C. Ouano sa barangay Looc ug dalan UN Avenue ug Jose P. Rizal Avenue sa barangay Ibabao Estancia.

Giingong dili makapamakak ang drayber kung duna siya’y nahimong kalapasan sanglit ang hulagway adunay nakabutang nga petsa, oras ug asang dapita nahitabo ang violation ingon man ang litrato mismo sa sakyanan ug ang plaka niini.  (BANATNEWS)