Kampanya vs. tipdas hingusgan, city health mag-house-to-house

CEBU, Philippines - Mobanat na karong Abril 4 ang pagsuroy sa mga barangay health workers ngadto sa tanang panimalay nga dunay nagpuyo nga mga bata nga nagpangidaron og 8-anyos paubos aron bakunahan batok sa tipdas.

Sumala pa ni Stella Ygonia sa Cebu City Health Department nga kinahanglan nga mabakunahan gyud ang mga bata gumikan kay dili lalim kung mataptan sa maong sakit sanglit dunay posibilidad nga makabsan sa kinabuhi ang bata kun mokomplikar na ang virus niini.

Ang dakbayan sa Sugbo adunay natala nga 22 nga kaso sa tipdas kumpara sa unom niadtong 2009 ug walay nangamatay sa nahisgutang mga tuig gumikan kay dali dayon nga gidala sa tambalanan ang mga nasakit niini.

Tambag pa ni Ygonia ngadto sa publiko nga dili kaayo magpasagad og duol sa mga tapok-tapok aron malikayan ang virus.

Sumala pa niya nga makatakod ang tipdas ug kasagaran sa mga biktima niini kadtong hinay og resistensiya.

“Mas maayo nga mokaon gyud ta og saktong pagkaon, aron molig-on ang atong immune system. Kay dili man gud na mamili og edad ang tipdas,” nagkanayon si Ygonia.

Usa sa mga sintomas sa tipdas mao ang grabeng hilanat nga molungtad ngadto sa lima ka adlaw, maglabad ang ulo ug manakit ang tibuok lawas.

Busa gitambagan ni Ygonia ang publiko nga motambayayong sa ilang programa, gani mosuroy mismo matag panimalay ang mga barangay health workers alang sa pagbakuna sa mga bata. (BANATNEWS)