Garcia misabot sa taas nga panahong absent si Sanchez

CEBU, Philippines - Misabot si Gob. Gwendolyn Garcia sa kahimtang ni Bise Gob. Gregorio Sanchez nga sulod na sa pipila ka adlaw nga wala makatambong sa mga sesyon sa Hunta Probinsyal tungod sa giingong gihambin niining sakit sa tutunlan.

Matud pa ni Garcia nga nakasabot siya sa kahimtang sa bise gobernador nga gikatahong bag-ohay pa lamang nakaabot sa Sugbo gikan nagpatambal sa hospital sa kaulohan.

Dihang gipangutana sa mga sakop sa media kun dili ba kini mobisita sa bise gobernador nga anaa karon sa Perpetual Soccuor Hospital sa siyudad sa Sugbo, si Garcia miingon nga dili siya makatubag niini.

Kini tungod kay sigon sa desisyon sa pamilya sa bise gobernador nga limitado lamang ang mga bisitang dawaton aron mahatagan og igong panahon ang bise gobernador nga makapahulay.

Dugang pa sa gobernadora nga iyang respetohan ang privacy sa bise gobernadora ilabi na niining panahon nga anaa sa talandugon nga kundisyon ang panlawas niini.

Si Garcia ug Sanchez walay maayong relasyon tungod sa panagbingkil sa politika.

Nasayran nga sulod pa sa pipila ka session nga si provincial board member Agnes Magpale na maoy mi-preside sa session tungod sa kapakyas ni Sanchez pagtambong sa senemanang sesyon. (Chester Abadilla/EIM)