Kaso batok sa mipatay kang Ellah Joy ipasaka na

CEBU, Philippines - Ipasaka na karong adlawa ang pormal nga kiha batok sa mga suspetsado sa pagdagit ug pagpatay kang Ellah Joy Pique.

Kini ang gipahibawo ni PRO-7 Chief Supt. Ager Ontog atol sa Talakayan sa Isyung Pulis (Tsip) forum kagahapon sa buntag sa media center sa Police Regional Office (PRO)7.

Matud ni Ontog nga nagkaestorya sila ni Sr. Supt. Louie Oppus ang Deputy Regional Director for Operation sa PRO-7 kinsa maoy pangulo sa Task Force Ellah Joy nga sa dili pa ang Abril uno kinahanglang ikasang-at na ang kaso ngadto sa piskaliya.

Malaumon si Ontog nga niining higayona dili na mahitabong ma-dismis sa piskaliya ang kaso.

Apan hangtod karon ang task force nagdumili gihapon paglambigit sa tag-iya sa Pajero nga si Bella Ruby Santos ug sa uyab niining langyaw nga si Ian Charles Griffith kansang sakyanan anaa karun sa kustodiya sa Criminal Investigation and Detection Group (CIDG)-7.

Mipasabot siya nganong nalangay ang pagpasaka sa maong kaso tungod kay gipalig-on og maayo sa task force ang mga ebidensya batok sa mga respondente aron dili na mabasura sa piskaliya, lahi sa nahitabo sa unang gipasanginlan nga mga suspetsado nga sila si Sven Erik Berger ug Karen Castro Esdrelon nga karon gawasnon na human idismis sa piskaliya ang ilang kaso.

Giangkon ni Ontog nga naglisod usab gyud sila sa maong kaso ni Ellah Joy sanglit ang ilang mga saksi pipila niini mga menor de edad hinungdan nga ilang gisiguro nga sa ikaduhang higayon dili na sila mosipyat.

Kabahin sa mga abogadong nagtinguha nga motabang sa kaso ni Ellah Joy, si Ontog miingon nga dili ngil-ad ang pagtabang sa ubang abogado sa maong kaso sanglit ang tumong ug tuyo niini mao nga makab-ot ang hustisya sa bata ilabina na sa pamilya niini.

Samtang gipresentar sa CIDG kagahapon ngadto sa korte ang nahipos nga mga ebidensya sa CIDG ngadto sa kampo ni Bella Ruby Santos ug Charles Griffith kini human aprobahi sa buhatan ni Judge Mendrado Paredes ang giduso niining motion to view seized items and take photographs. Nasayran nga ang kampo ni Santos miduso sa maong mosyon human nila hisayri nga adunay nawala nga mga butang sa ilang balay sa dihang gipahigayon ang search operation. Matud pa sa abogado ni Santos nga si manlalaban Anna Luz Cristal nga ang rason nga ilang giduso ang maong mosyon mao nga aron masiguro nila nga ang nawala nga sapatos ug t-shirt ni Santos wala maapil og dala sa CIDG.

Apan dihang gipakita na sa korte ang mga nakuha nga butang gikan sa balay ni Santos wala didto ang giingong nawala nga butang ni Santos.

Gipakita sa korte mao ang buhok, cord, five cut portion of bed sheets nga adunay gidudahang blood stain, USB, USB ug cord reader, video camera uban sa unom ka tape ug accessories, napulo ka sex toys, lima ka habol nga adunay gidudahang dugo, upat ka empty pornographic covered ug napulo ka CD.

Samtang matud pa sa kampo ni Santos nga sa 15 ka mga ebidensya 13 lang niini ang gipakita diin usa sa wala mapakita mao ang sakyanan nga SUV.

Matod usab sa collaborating counsel ni Cristal nga si manlalaban Ramises Villagonzalo nga ilang nakita nga pipila sa mga butang nga nakuha sa CIDG walay pirma.  - BANAT NEWS