PDEA director general nagpasalamat ni Gwen

CEBU, Philippines - Aduna na unyay kaugalingong laboratory ang Philippine Drug Enforcement Agency kon PDEA dinhi sa Central Visayas aron magamit sa pagpahigayon og chemical examination sa mga ebidensyang ilang masakmit.

Kini human nga gipahibalo ni Gob. Gwendolyn Garcia nga andam kining motabang sa suliran karon sa maong ahensya pagpa-eksamin sa ilang mga ebidensyang makuha nga sa pagkakaron kinahanglang dad-on pa sa Manila alang sa mas lawom nga pag-analisar nga dili mahimo sa kasamtangang laboratory sa PNP Regional Crime Laboratory.

Si Director General Jose Gutierrez Jr. sa PDEA mipasalamat kang Garcia kabahin sa maong kalamboan ug kini miingon nga importante kaayo sa PDEA ang susamang laboratoyo.

Dugang pa ni Gutierrez nga sa maong kalamboan dili na kinahanglan nga dad-on ang mga gidudahang ilegal nga drugas ngadto sa kaulohan.

Gani matud pa ni Director Gutierrez nga malakip usab unya nga makabinipisyo niini ang mga silinganang lalawigan sa Sugbo.

Atol sa meeting nila ni Garcia ug mga opisyales sa PDEA nasabutan nga ang lalawigan sa Sugbo ang mogasto sa edipisyo nga mokantidad og 7.2 milyones pesos samtang ang PDEA ang mopalit sa MCI machine, ang machine nga mo-analisar sa gidudahang ilegal nga drugas nga mobalor og P2 milyones.  - BANAT NEWS