Pagbitay sa 3 Pinoy sa China gibasol sa kanhi DDB official sa gobiyerno

CEBU, Philippines - Gibasol sa kanhi opisyal sa Dangerous Drugs Board ang lugak nga kampanya sa gobiyerno pagsumpo sa suliran sa gidiling drugas dinhi sa nasud nga maoy usa sa hinungdan sa pinugos nga kamatayon sa tulo ka Filipino nga gibitay kagahapon pinaagi sa lethal injection didto sa China.

Si kanhi DDB undersecretary Paul Clarence Oaminal miingon nga kun seryuso pa ang administrasyon ni Presidente Benigno Noynoy Aquino pagbungkag sa sindikato sa ginadiling drugas may purohan nga dili kadto mahitabo.

Kagahapon gibitay sila si Sally Ordinario Villanueva, Ramon Credo ug Elizabeth Batain sa managlahing lugar sa China tungod sa kasong drug trafficking.

Matud pa ni Oaminal dinhi palang unta daan sa Pilipinas gisumpo na sa gobiyerno ang transaksiyon sa ginadiling drugas dili na makalarga pa didto sa China ang mga nakonbikto nga Filipino.

Gihimong sanglitanan ni Oaminal ang kahuyang sa lagda sa gobiyerno batok niadtong mga langyaw nga mosulod dinhi sa nasud bisan og dili pa matino ang background sa pagkatawo niini.

Gani gihimong sanglitanan ni Oaminal ang yano rang pagpasulod dinhi sa Pilipinas sa usa ka Japanese national niadtong milabay’ng bulan sa Enero ning tuiga bisan og nakonbikto na kini sa kasong may kalambigitan sa gidiling drugas didto sa Japan.

Nunot niini giawhag ni Oaminal ang gobyerno alang sa pagpatuman og hiniusang lakang aron pagdugtong sa lain laing ahensiya sa gobyerno pagpalig-on sa kampanya batok gidiling drugas. - BANAT NEWS