CEBU, Philippines - Gilibkas na ni Gob. Gwendolyn Garcia niadtong nakalabay nga adlaw ang iyang cease and desist order kalabot sa paghakot sa mga carbon fuel diha sa Korean Electric Power Corp. sa Tinaan, Naga.
Gitugotan na og balik ni Garcia ang Kepco sa ilang normal nga operasyon human kini matagbaw sa nakitang pamaaging gisagop sa Kepco aron dili na makahatag og problema ngadto sa mga konstituwente sa Naga ang abog gikan sa maong planta.
Matud pa ni Garcia ang paglibkas natigayon ubos sa daghang mga kondisyon, kini sama sa kanunay nga pagbisbis og tubig sa Kepco sa ilang mga stock file sa coal, walay mahitabong paghakot sa abo o ba kaha coal kung kusog ang hangin.
Buot usab sa gobernadora nga sugdan na dayon ang pagtrabaho sa mga mitigating measures ug tapuson kini dayon sa gitakdang oras.
Mibahad si Garcia nga dili siya magpanukong ibalik ang maong kamandoan kung subli siyang makadungog og reklamo gikan sa mga residente tungod gihapon sa pagpabaya sa maong planta.
Sa sayo pa, si Garcia mimando sa Kepco paghunong sa paghakot niini ug sa ilang mga coal fuels gikan sa pantalan padulong sa planta ug ang paghakot sa ilang mga abo human moreklamo ang mga residente sa abog.
Si Kepco-SPC environmental staff, Engr. Neil Miral mipasalig nga ilahang sundon ang mga sugyot ug mga pamaagi aron dili makahasol sa mga residente ang ilang operasyon.
Kahinumduman nga si Garcia mipagawas sa Executive Order No. 04, series of 2011, nga nag-ingong : samtang polisiya sa lalawigan sa Sugbu nga mahatag ang gikinahanglang panginahanglan sa kuryente sa mga konstituwente niini kinahanglang himuon kini nga dili magsakripisyo sa kinaiyahan ug sa kaayohan sa publiko. - BANAT NEWS