Mipatay sa kapitan mitahan

CEBU, Philippines - Gipriso na kagahapon ang duha ka suspetsado sa pagpusil patay sa kanhi kapitan sa barangay Vito lungsod sa Minglanilla human sa duha ka adlaw niining pagtago-tago.

Sila si Roberto Villamor Peregrino ug Rogelio Paran Cabatuan, nga taga sitio Camarin sa nahisgutang barangay boluntaryong mitahan sa ilang kaugalingon ngadto sa kapolisan.

Sa pakighinabi sa Banat News ni SPO1 Renato Masangkay, sa Minglanilla Police, ang team leader sa pagsikop sa duha ka suspetsado, nasayran nga niadtong Lunes, ang asawa sa duha ka suspetsado uban ni kanhi konsehal Jimmy Caumeron sa maong lungsod midangop sa ilang buhatan ug mipahibalo nga andam nang motahan ang duha ka suspetsado.

Si Masangkay uban sa kaubanan miadto dayun sa nahimutangan sa duha ka suspek ug didto miangkon ang duha nga silay nagpatay kang kanhi kapitan Nonito Abella Alicamen sa Vito ug busa giposasan dayon sila.

Nasayran nila ni Masangkay nga si Perigrino ug ang biktima sa sayo pa nagkalalis bahin sa yuta.

Kahinumdoman nga niadtong Sabado sa gabii ang biktima nagpahayahay sa lingkoranan sa gawas sa ilang balay dihang kalit lang mipatim-aw ang duha ka lalaki ug mipaulan kaniya og mga bala.

Ang biktima nasabak sa iyang ilok, abaga ug tiyan nga miresulta sa iyang kamatayon.  - BANAT NEWS  

Show comments