CEBU, Philippines - Angol ang usa ka tawo kinsa gidunggab sa kusinero sa usa ka karaoke bar sa sitio Datag sa barangay Maribago, dakbayan sa Lapulapu sa miaging kaadlawon.
Ang biktima mao si Teodoro Paquibot Zafra, 20, ulitawo, samtang ang suspetsado nailhan usab nga si Michael Neri, hingkod ug kusinero sa usa ka karaoke bar sa maong lugar.
Si PO2 Carlos Baluado sa homicide section sa kapolisan sa maong dakbayan nga nahinabi sa Banat News miingon nga kuyog sa biktima ang iyang mga barkadang babaye ug mga lalaki sa pagsulod sa nahisgotang karaoke bar ug nag-inom kini sulod sa maong lugar.
Naabtan og kaadlawon ang ilang pag-inom unya kalit lang nagkalalis ang suspetsado ug usa sa mga kaubang lalaki sa biktima ug gisumbag sa suspetsado ang naulahi. Gumikan kay kusinero, dali kaayong nakakuha og kutsilyo sa ilang kusina kay dunggabon ang iyang gikalalis.
Apan gisugat kini sa biktima kay pugngan ug tambagan unta dihang siya (biktima) mao na hinuoy nahansakan sa maong kutsilyo. (Romeo T. Limpangog/WC) (BANAT)