CEBU, Philippines - Patay ang usa ka drayber sa traysikad samtang angol usab ang usa sa tulo niya ka pasahero human kini dasmagi sa bus pasaheroan didto sa North Poblacion, dakbayan sa naga sa miaging hapon.
Ang namatay mao si Antonio Lastimado, 41, ulitawo, nga taga West Poblacion ug usa ka drayber sa traysikad.
Samtang ang naangol mao si Gina Alforque, 52, minyo, samtang ang 3 anyos niyang apo ug laing pasahero wala maunsa.
Samtang ang drayber sa bus pasahero-an nga BB Gemma nga gipanag-iya sa Villahermosa Bus Liner mao si Lemarcc Villahermosa, 28 anyos, ulitawo nga taga barangay Balatic, lungsod sa Dalaguete.
Si PO1 Rongie Nadora sa Naga City Police Station mibutyag sa Banat News nga ang biktima nagpadagan sa iyang traysikad sakay ang tulo ka pasahero nga gisunod sa BB dihang pag-abot sa eskina sa maong lugar moliko na unta siya apan gidasmagan kini sa bus.
Gumikan sa kakusog sa pagkadasmag, nalagpot ang biktima ug sa pagtugpa niini sa sementadong karsada naugbok ang ulo hinungdan sa hinanaling kamatayon niini.
Daling gihatud ang biktima sa South General Hospital diin didto kini ideklarar nga dead on arrival.
Ang drayber sa bus pasaheroan bulontaryo hinuong mitahan sa kaugalingon human sa hitabo ug nagtingkagol na karon sa karsel samtang gihikay ang kasong ipasaka batok kaniya. (Darrel A. Carumba) (BANAT)