Lalaki gidunggab sa kapuyo angol

CEBU, Philippines - Gumikan sa pangabubho, naangol ang usa ka lalaki human kini dunggaba sa iyang kapuyo sa ilang balay didto sa Sitio San Antonio, Brgy. Jagobiao, dakbayan sa Mandaue sa milabay’ng gabii.

Ang biktima mao si Romeo Magallano, 35, nga taga Jagobiao, samtang ang kalive-in niyang miunay og dunggab kaniya mao si Merly Labrador, 38.

Base sa imbestigasyon sa kapolisan sa Presinto 3 sa Mandaue City Police Office (MCPO) nasayran nga sa sayo pa nag-inom ang biktima ug ang suspetsado ug dihang nangalasbag na nagkalalis ang duha.

Sa dihang miinit na ang maong lalis giingong gisumbag sa biktima ang suspetsado ug sa kabalaka nga tiwason siya, midagan ang suspek sa ilang kusina ug mikuha og kutsilyo dayong hansak ngadto sa tiyan sa biktima.

Ang biktima daling gihatod ngadto sa Mandaue City District Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo.

Samtang ang suspetsado nagpahayahay na karon sa prisohan sa kapolisan. (Bong Soriano/WC) (BANAT)