CEBU, Philippines - Giawhag ni Romeo Cordova, ang tsirman sa Police Coordinating and Advisory Council nga mag- “graceful exit” nalang si Cebu City Jail warden Supt. Felixberto Jagorin.
Gipahibalo niya nga gusto na nilang pailisan si Jagorin human kini miingong dili niini kayang bantayan ang seguridad sa kontrobersyal nga polis nga si SPO1 Adonis Dumpit nga kasamtangang nagtingkagol karon sa Cebu City Jail diha sa Barangay Kalunasan.
Una nang gipadayag ni Jagorin nga “incapable” sila sa pagdumala ni Dumpit atol sa hearing niini sa milabay nga buwan ubos sa sala ni Regional Trial Court Judge Ester Veloso sa Branch 6.
Si Dumpit nag-atubang og kasong murder gumikan sa pagpusil patay sa 17- anyos nga si Ronron Go niadtong 2004.
Gipadayag ni Cordova nga kasamtangan niya karong gihimo ang usa ka suwat nga pirmahan ni Mayor Michael Rama nga mag-awhag nga pailisan ug ibalhin sa laing lugar si Jagorin.
“Ako niya (Jagorin) nga mo-graceful exit na lang gyud apan dili man daw kuno siya, kay gusto siya magpaabot pormal nga mando ni Mayor Rama. Akong gibuhat karon kay nag-draft ko og letter nga mag-awhag sa ilang head nga ipabalhin siya og laing lugar,” sumala pa ni Cordova.
Kahinumduman nga mihangyo kaniadto si Jagorin nga ipabalhin sa Talisay City Jail si Dumpit apan mipadayag ang maong prisohan nga dili sila makahatag og escorts ni Dumpit kung dunay mga hearing sa kaso gumikan nagkuwang ang ilang mga tawo.
Gibasura usab ni RTC Judge Ester Veloso ang naghupot sa kaso ni Dumpit ang petisyon kabahin niini tungod kay mabaw kaayo ang rason ni Jagorin.
Ang kampo ni Dumpit mipasaka og mosyon kagahapon nga nag-awhag nga mopa-inhibit nalang sa kaso si Judge Veloso tungod sa rason nga wala niini paghatag og pagtagad sa gipangayong duha ka mahinungdanong petisyon sa iyang kampo sama sa pag-downgrade gikan sa murder ngadto sa homicide ug ang pagpabalhin kang Dumpit og laing bilanggoan tungod sa peligro sa seguridad niini.(Sanden J. Anadia/EIM) (BANAT)