PNoy moanhi sa Sugbo

CEBU, Philippines -  May dakong kalagmitan nga moanhi sa dakbayan sa Sugbo si Presidente Benigno Simeon Aquino III sa grand opening sa Plaza Independencia (PI) karong Mayo 1, 2011.

Kini kun mosanong ang Pamuno Nasud sa imbitasyon sa kagamhanan sa dakbayan sa Sugbo sumala ni Mayor Michael Rama kinsa nagkanayon nga gipangandaman pag-ayo karon sa kagamhanan sa dakbayan ang maong kalihokan ilabi na nga anaa na sa 70 porsento ang kahumanan sa pagpatahom sa PI nga gigastohan og P40 milyones.

Matud pa sa mayor nga usa sa mga gidapit niya nga motambong sa maong kalihokan mao ang Pamuno nasud.

Nagsugod ang trabaho sa pagpaanindot sa PI niadtong 2009 human sa walo ka tuig nga pagplano niini

Inigkahuman niini, dili na kini plaza nga sama kaniadto nga kasuroyan ni bisan kinsa tungod kay ang mga vendor dili na tugotang makapaninda pa sulod sa maong lugar.

Gusto sa mayor nga mamintenar ang kahinlo ug katahom sa maong lugar aron ganahan ang mga turista sa pagsuroy sa maong dapit.

Kaniadto daghan kaayong paregla diha sa maong lugar gumikan kay pundokanan kini sa tanang matang kriminal panahon sa kagabhion, apan inig kahuman niini higpit na ang siguridad nga ipatuman sa maong lugar.

Gituohan sa mayor nga usa sa makapaislag sa mga kriminal, mao ang kadaghan na unyang mga guwardiya nga idestino niini ug labaw sa tanan ang kahayag unya sa palibot pinaagi sa mga lamppost nga maoy usa sa makahadlok sa mga kriminal. (BANAT NEWS)