Nakaluba gikulata sa mga standby

CEBU, Philippines - Nasugamak sa mga bun-og ang usa ka kriminal human kini kulataha sa mga estambay nga migukod kaniya human niya dunggaba ang usa ka ulitawo didto sa sitio Sudtonggan sa barangay Basak sa dakbayan sa Lapulapu sa miaging kaadlawon.

Ang suspetsadong nabun-og mao si Romnick Baldoza, 19, kinsa midunggab kang Lorencio Ando, 20, ulitawo , nga taga Sudtonggan.

Matud pa ni PO2 John Carlo Jucotan sa homicide section sa kapolisan sa dakbayan sa Lapulapu nga nagkalalis si Baldoza ug si Ando ug dihang nahutdan na sa katarungan ang suspek milanit kini sa iyang kutsilyo ug gihansak sa tiyan sa biktima.

Dihang nahagba sa yuta ang biktima, si Baldoza mikaratel og dagan pahilayo sa maong lugar , apan gigukod kini sa mga estambay ug dihang naapsan, gitabangan og kulata dayon gihatod ngadto sa buhatan sa kapolisan.

Si Aldo dali usab nga gidala ngadto sa Lapulapu City District Hospital apan gibalhin kini sa Vicente Sotto Memorial Medical Center sa dakbayan sa Sugbo.

Dugang pa ni PO2 Jucotan nga ang suspetsado nagtingkagol na karon sa prisohan samtang nag-atubang na kini sa kasong gisang-at batok kaniya. (BANATNEWS)