Mga opisyal sa Olango gibansay-bansay

CEBU, Philippines - Ang mga barangay official sa isla sa Olango sa dakbayan sa Lapulapu gipaubos sa pagbansaybansay aron makapanagang sila sa panahong may bagyo, linog ug tsunami nga moigo sa ilang lugar. Si Association of Barangay Council (ABC) Federation President Leo Mercado kinsa maoy barangay kapitan sa Pajo nga nahinabi sa Banat News miingon nga nakita niya ang kamahinungdanon sa mga pagbansaybansay aron masinati ang mga opisyal sa mga butang nga angayan nilang buhaton pananglit may katalagman silang masugatan.

Dugang pa ni Mercado nga gisundog sa maong mga opisyal sa barangay sa Olango ang gihimo sa mga opisyal sa barangay sa mainland sa dakbayan sa Lapulapu.

Si Kapitan Mercado miingon nga mahinungdanon kaayo alang sa mga barangay opisyal ang kanunay nga pagpangandam aron makatabang kini sa pagsalbar sa mga molupyo sa panahon sa mga katalagman sama sa nahitabo sa Japan. (BANATNEWS)