CEBU, Philippines - Kusganong gipang-himakak ni Gobernador Gwendolyn Garcia ang alegasyon ni Cebu City South District Congressman Tomas Osmeña nga misupak ang mga kongresista sa One Cebu sa pagpa-impeach ni Ombudsman Merceditas Gutierrez aron depensahan ang kaso sa Kapitolyo nga nag-ung-ong pa karon sa buhatan sa Ombusman.
Sumala sa gobernador nga dili tinuod ang maong pagtuo ni Osmeña kay ang pagbotar nila ni Kongresista Pablo Garcia, Pablo John Garcia, Benhur Salimbangon ug Pastor Alcover Jr. og “No” ilang kaugalingong kabubut-on.
Giangkon sa gobernador nga tinuod nga nag-ung-ong pa karon sa Ombudsman ang kaso bahin sa pagtukod sa Cebu International Convention Center, ang pagpalit sa Balili property ug uban pa.
Apan gipasabot ni Gobernador Garcia nga wala niya but-i ang mga kongresista sa angay nilang pagabuhaton bisan kun amahan ug igsoon pa niya ang duha ka Garcia.
Giklaro ni Garcia nga dili na siya mahibulong sa maong alegasyon gikan sa iyang mga kaatbang sa politika kay nasayud siya nga nangita sila kanunay og isyu nga ikabato kaniya.
Matud pa ni Garcia nga daan na niyang napanglantawan ang iyang mga kaatbang sa politika mohimo gyud og espekulasyon batok kaniya aron lang pagdaot sa iyang dungog.
Gani gitumbok sa gobernador nga dili na usab siya masurprisa kun matag lihok niya bantayan sa iyang mga kaatbang tungod kay nangita kini sila kanunay og isyu nga batok kaniya. - BANAT NEWS