CEBU, Philippines - Pulos samdan ang tulo ka tawo human kini pamusila sa wala hiilhing mga lalaki nga nagsakay og motorisklo didto sa barangay Catarman, Lungsod sa Liloan sa miaging gabii.
Ang mga biktima mao sila si Joseph Donaire Maglasang, 21, Gerald Pabular Lapis, 19, ug Junrey Sar Pepito, 18, pulos ulitawo, ug taga Catarman ang tanan.
Si Maglasang ug Lapis pulos natiyan, samtang si Pepito, nasabak sa bukton.
Ang mga biktima kinsa gihatod dayon ngadto sa Vicente Sotto Memorial Medical Center sa dakbayan sa Sugbo miingon nga wala silay kontra ug wala sila makaila sa mga tawong miluthang kanila.
Ang kapolisan nagtuo nga gipareglahan lang ang mga biktima, samtang ang mga tigpaniid nagkanayon nga mao kini pago sa mga batan-ong maglaroy-laroy bisan sa lawom nang kagabhion nga dili patuo og badlong sa mga ginikanan.
Sa pagkakaron padayon pang gipangita sa kapolisan ang mga kriminal. - BANAT NEWS