Ex-Brgy. Kap gipatay

CEBU, Philippines - Patay ang kanhi kapitan sa barangay Veto, sa lungsod sa Minglanilla human kini pusila sa wala mailhing lalaki samtang naglingkod diha sa gawas sa iyang balay nga nahimutang sa nahisgutang barangay niadtong Sabado sa gabii.

Ang biktima mao si Nonito Alicamen, 50, kinsa nakaangkon og tulo ka samad pinusilan sa duol sa iyang ilok, abaga ug tiyan daling gidala sa mga mirespondeng polis ngadto sa Minglanilla District Hospital apan wala na kini makaabot nga buhi sa nahisgutang tambalanan.

Na-recover sa kapolisan diha sa lugar nga nahitaboan ang usa ka deformed nga slug sa wala pa mapihong kalibre sa bala ug usa ka paresan sa tsinelas nga kolor blue nga gituohang iya sa kriminal kinsa daling miikyas human sa hitabo.

Ang kapolisan duna nay gisundan nga lead kabahin sa maong hitabo hinuon wala pa nila ibutyag ang pangalan sa tawong ilang gidudahan sanglit nagpadayon pang hot pursuit operation ug imbestigasyon.

Apan si PO1 Jerome Abarquez sa Minglanilla Police Station mibutyag nga ang biktima ug ang silingan nagkabangi kabahin sa yuta sukad pa niadtong milabay’ng tuig.

Niadtong Biyernes ang suspetsado ug ang biktima nagkalalis kabahin gihapon sa yuta ug atol sa maong lalis giingong gisukmag ni Alicamen ang nawong sa maong tawo apan nauwang sila sa ilang mga silingan.

Usa sa paryente sa nasukmagan sa biktima ang giingong misulti ngadto sa polis nga nakabati siya nga ang maong nasumbagan misulting “manglayas mi kay nakaigo mi.”

Matud ni Abarquez adunay kakunsabo ang mamumuno nga higala ra usab niini. - BANAT NEWS