Joavan mireklamong gipabuthan

CEBU, Philippines - Ang kaniadto maoy sigeng ireklamo ug pasanginlang nangabuso og mga tawo ang kontrobersiyal nga sinagop ni Mayor Socrates Fernandez nga si Joavan Fernandez mao karoy mireklamong gipabuthan og pusil sa wala mailhing grupo.

Si Joavan midangop sa kapolisan ug misumbong nga upat ka mga wala mailhing lalaki ang kalit nga miduol kaniya diha sa may flyover sa barangay Tabunok, dakbayan sa Talisay niadtong Sabado sa gabii.

Si Joavan miingon nga ang upat sa walay igong rason gipatid-patiran ang iyang Isuzu Big Horn nga puwa ug nagtangag sa plakang YEZ-460 nga nagparada diha sa lugar.

Matud usab ni Joavan nga wala pa makontento ang maong mga tawo usa kanila ang mipasalba pa og pusil.

Sa maong sitwasyon gibati og kahadlok si Joavan ug mipasutoy sa iyang sakyanan paingon ngadto sa police station sa barangay Poblacion.

Wala hinuon ibutang diha sa blotter kung unsay gibuhat ni Joavan sa maong dapit nianang orasa sa gabii.

Kahinumduman nga sa milabay’ng semana si Joavan gipasanginlan ni Jerick Bulado, drayber sa jeep nga pasaheroan kinsa nagkarga og mga kahoy nga gikilkilan siya og P5 mil sa sinagop sa mayor apan gibakwi niya dayon ang pasangil human sila magka-estorya sa mayor. - BANAT NEWS