'Wanted' nga lalaki nasikop sa polis

CEBU, Philippines - Nadakpan sa kapolisan ang usa ka “wanted” nga lalaki gumikan sa kasong may labot sa illegal drugs, dihang mipauli kini sa ilang balay sa sitio Lab-ang, sa barangay Casuntingan, dakbayan sa Mandaue sa miaging gabii.

Ang suspetsado giila nga si Sherwin Macalipay, 30 , ulitawo nga taga Mandaue kinsa gawas sa kaso bahin sa ginadiling drugas, giingong nalambigit usab kini sa kasong   pagpamusil sa maong dakbayan.

Si Macalipay, nakalipay kaayo sa mga sakop sa City Anti Illegal Task Force (ACAIDSOTF) nga maoy misikop kaniya sa ilang balay.

Si Macalipay gipangita sa kapolisan human kini moikyas dihang gironda sa mga otoridad ang iyang balay sa miaging semana. 

Sa maong higayon, gisikop sa kapolisan ang iyang kapuyo nga maoy nahibilin sa ilang balay dihang mikabad og dagan si Macalipay pag-abot sa kapolisan.

Si Inspector Ramil Morpos nga maoy deputy chief sa Investigation Detection and Management Bureau (IDMB) sa Mandaue `miingon nga human nila madawat ang mga taho nga mipauli si Macalipay sa ilang balay, milihok dayon sila aron sa pagronda sa balay sa suspetsado.

Didto naabtan sa kapolisan si Macalipay nga malipayon kaayong nakig-inom sa iyang mga barkada   ug wala na kini moreklamo dihang giposasan siya. Nagpahayahay na siya karon sa prisohan sa dakbayan sa Mandaue. (WC)  (BANAT)