Sikyu nga way lisensya gipriso

CEBU, Philippines - Usa ka security guard nga walay lisensya sa pagka-guwardiya lakip ang iyang armas de fuego nga gigamit wala usay lisensya gipapahuway sa kapolisan sa Talisay City detention cell. Ang nagtingkagol karon sa prisohan mao si John Dariel Amaro, taga lungsod sa Minglanilla ug lumad nga taga Guihulngan Negros Oriental, kinsa security guard ubos sa Eagle Rock Security Agency nga nahimutang sa 353 Nivel Hills, barangay Lahug, dakbayan sa Sugbo.

Si PO3 Edwin Alvarado, duty desk officer sa Talisay City Police Station sa pakighinabi sa Banat News nagkanayon nga si Amaro niadtong Biyernes lang kini mi-duty isip gwardiya sa Valley View Village sa barangay Mohon, dakbayan sa Talisay.

Usa ka homeowner nga si Rey Laya, 46, wala makauyon sa gipakitang lihok ni Amaro tungod kay giingong “yaya ug luya” kaayo ug gani maglingkod lang kini kun mosaludo sa mga homeowner nga moagi sa gate.

Gumikan niini si Laya mitawag ngadto sa TCPS ug mihangyo sa kapolisan nga ipasukit-sukit si Amaro kung aduna ba kini lisensiya isip gwardiya aron mapiho kung gwardiya ba gyud kining tinuod. Sila si PO3 Renato Pendo, PO1 Jude Enemecio ug PO1 Mario Cartuciano ang miresponde sa hangyo ni Laya.

Dihang gisukit sa mga otoridad, miangkon si Amaro nga wala siya’y lisensya sa iyang pagka-sikyu ug lakip usab ang iyang service firearm nga .38 kalibreng revolver gawas nga walay lisensya, wala pa gyuy bala.

Isip pagtuman sa balaod gisikop og diretso sa kapolisan sa Amaro ug gipaslak sa prisohan.

Matud usab ni Alvarado nga susihon usab nila ang buhatan sa Firearms, Explosives, Security Agency and Guards Services (FESAGS) kun rehistrado bang sikyu si Amaro ug ingon man ang service firearm niini. (Brenda D. Batuto/WC) (BANAT)