Pork barrel ipatangtang ni Alcover

CEBU, Philippines - Gihagit ni Representante Pastor “Jun” Alcover sa Alliance for Nationalism and Democracy (ANAD) Partylist si Kongresista Tomas Osmeña sa south district sa dakbayan sa Sugbo nga magtambayayong sila pagpalabang og balaodnon sa kongreso aron ipawagtang ang minilyon ka pesos nga pork barrel matag tuig sa tanang mga kongresista.

Kini tungod kay matud ni Alcover ang pork barrel maoy tinubdan karon sa lapad nga korapsiyon sa gobyerno nga gigamit usab sa Malacañang sa pag-pressure nilang mga kongresista isip suborno kun may buot kining ipapasar nga balaodnon sa kongreso.

Gani gawas kang Osmeña gihagit usab ni Alcover si Presidente Benigno Noynoy Aquino III nga kun seryuso kini sa kampanya batok sa korapsiyon angay paminawon ang iyang awhag pagtangtang sa P780 milyones nga pork barrel matag tuig nilang mga kongresista lakip na ang P200 milyones matag tuig nga pork barrel sa mga senador.

Si Alcover miangkon nga imposibli nga mahitabo ang iyang hagit kay nakasiguro siya nga daghan sa mga kaubanan niya sa kongreso ang mosupak niini.

Si Alcover miinsister nga gi-pressure sa Malacañang ang mayoriya sa mga kongresista nga mibotar pabor sa pagpa -impeach kang Ombudsman Merceditas Gutierrez.

Gani gibulgar niya atol sa presscon nga gipatawag silang tanang partylist nga kongresista pipila ka adlaw sa wala pa ang botasyon sa kongreso bahin sa impeachment.

Ang mipatawag kanila mao ang political adviser ni Presidente Aquino nga si Ronald Yamas kinsa mipasalig nga ipa-release na ang ilang pork barrel nga pakapinan pa og P20 milyones nga proyekto, gawas sa P30 mil nga cash nga pahalipay kanila kun mobotar sila og “Yes” sa impeachment ni Gutierrez.

Gawas kang Alcover, ang ubang mga magbabalaod nga Sugboanon kinsa mibotar usab og “No” sa impeachment mao sila si Kongresista Pablo Garcia, sa Segundo distrito, Pablo John Garcia, sa tersiro distrito ug Benhur Salimbangon sa ika-upat nga distrito.(WC) (BANAT)