'Utok' pagsuway og papatay sa ugangan kusganong mihimakak

CEBU, Philippines - Kagahapong adlawa mitingog na ang umagad sa pamilyang Mier nga maoy gipasanginlang maoy utok sa napakyas nga pagpapatay sa negosyanteng si Maria Lina Mier ug sa bana niini nga si Ernesto Mier.

Sa gipahigayong interbyu sa igsuong pamantalaan sa Banat News nga The Freeman kang Manilyn Mier, kini mibutyag dako kaayo ang iyang katingala nganong naapil siya sa maong krimen.

Matud pa ni Mier nga imposible kaayo nga siya makabuhat sa ingon ngadto sa iyang ugangan tungod sa kamaayo niini nganha kanila.

“They are good to me especially Kurt’s (iyang bana) dad. I have nothing against my in laws,” pasabot pa ni Mier kinsa kanhi opisyal sa barangay.

Midugang pa si Mier nga mismong ang iyang mga ugangan pa gani ang mitabang kaniya dihang mikandidato siya pagka-kagawad sa barangay niadtong 2007.

Gani giklaro usab ni Mier ang mga nanggawas nga estorya nga mibiya siya sa panimalay sa iyang ugangan human sa maong insidente nga dili kadto iyang kabubut-on.

“Wala ko milayas, ilaha ko’ng gipalayas,” pasabot pa ni Mier.

Pasabot pa ni Mier nga niadtong Marso 23 sa gabii mibiya siya sa panimalay sa pamilyang Mier human giigong giingnan siya sa gwardiya sa panimalay sa mga Mier nga dili na siya pasudlon niini.

Gani tungod sa maong panghitabo mikontak dayun siya sa iyang abogado aron pakisayran kun pwede ba nga makuha niya ang iyang mga sinina ug ang iyang duha ka anak.

“When the incident happened, naa ra ko sa balay until Wednesday bisan ila nakong gi-alleged nga ako ang mastermind,” saysay pa ni Mier.

Giklaro usab ni Mier nga wala siya magtago-tago karun, dili lang gyud siya buot mopakita tungod sa mga hulga sa kinabuhi nga iyang nadawat. Butyag usab ni Mier nga maabot ra usab ang panahon nga mopatim-aw siya ug limpyohan niya ang nahugawan niyang ngalan.

Nasayran nga usa sa mga nasikop nga suspetsado sa maong insidente nga si Sim Abordo mitug-an ngadto sa kapolisan nga si Manilyn maoy mikuha sa ilang serbisyo pinaagi usab sa usa ka Vicente Maestrado isip middleman aron ipapatay si Maria Lina Mier. (Lesley Caminade-Vestil ug Garry Lao-The Freeman/EIM) (BANAT)