RTWPB-7 mopatawag sa ubang government agency

CEBU, Philippines - Dapiton sa Regional Tripartite Wages and Productivity Board (RTWPB-7) ang kadagkuan sa Department of Energy (DOE) ug ang mga kompaniya sa lana atol sa ilang tigum sunod bulan sa pagpadayong pagtuki sa giduso nga P120.40 nga petisyon alang sa gipangayong dugang usbaw sa suholan sa mga mamumuo dinhi sa Sugbo ug tibuok Central Visayas.

Gibutyag ni Department of Labor and Employment (DOLE-7) ug RTWPB-7 regional director Elias Cayanong dihang nahinabi sa Banat News pangayoan nila og katin-awan ang maong mga hingtungdang ahensiya ug kompaniya kabahin sa sunod-sunod nga pagsaka sa presyo sa lana nga maoy himuong basehanan pagsuta sa merito sa gidusong petisyon.

Lakip sa posibleng imbitahon mao ang National Food Authority (NFA) aron makahatag usab kini og katin-awan sa presyo sa bugas nunot sa sunod sunod nga usbaw sa lana ug ang Land Transportation Franchising and Regulatory Board (LTFRB)-7 kabahin usab sa pletihan.

Gipasabot ni Cayanong gikinahanglan gyud nila ang kooperasyon sa maong mga ahensiya ug kompaniya aron makakab-ot sila sa patas nga desisyon sa gipangayong umento.

Sa pagkakarun moabot ngadto sa P285 ang minimum nga sweldo sa mga mamumuo dinhi sa Central Visayas.

Nagkanayon si Cayanong nga kun ang presyo lang sa lana ang basihan dili pa kini balidong rason tungod dili pa normal ang presyo niini gumikan kay magsaka-kanaug kini matag karun ug unya.

Ang Alliance of Progressive Labor (APL) inabagan sa lain laing grupo sa mga mamumuo dinhi sa Sugbo ang miduso sa maong petisyon sa umento sa suholan sayo ning bulana. (Darrel Carumba/EIM)  (BANAT)